Maoni:Ngara Inaweza Kuwa Lango Kuu la Uchumi wa Tanzania. Je, Tuko Tayari Kutumia Fursa Hii?

Na Juventus Juvenary Illambona

Ngara ni miongoni mwa wilaya zenye nafasi ya kipekee nchini. Kijiografia, imebarikiwa kuwa kiunganishi muhimu kati ya Tanzania na nchi jirani za Rwanda, Burundi na Jamhuri ya Kidemokrasia ya Congo (DRC), huku ikiwa karibu na mpaka wa Uganda.

Kwa nafasi hii, Ngara inaweza kuwa lango la biashara la Tanzania katika Ukanda wa Maziwa Makuu na kitovu cha uwekezaji, usafirishaji na maendeleo ya uchumi.

Mbali na jiografia yake, Ngara imejaliwa kuwa na rasilimali nyingi na fursa zinazozidi kuongezeka. Uwekezaji katika sekta ya madini kupitia Mgodi wa Tembo Nickel, uboreshaji wa miundombinu na utekelezaji wa miradi mbalimbali ya maendeleo ni ishara kuwa mustakabali wa wilaya hii unaweza kuwa mzuri zaidi kuliko wakati mwingine wowote.

Hata hivyo, maendeleo haya yanapaswa kutuongoza kujiuliza swali moja la msingi: Je, wananchi wa Ngara wameandaliwa vya kutosha kunufaika na fursa hizi, au wataendelea kushuhudia wengine wakizitumia?

Maendeleo hayapaswi kupimwa kwa thamani ya uwekezaji pekee, bali pia kwa kiwango ambacho yanabadilisha maisha ya wananchi.

Ni muhimu kuhakikisha kuwa wananchi wanapata elimu, mafunzo ya ujuzi, taarifa sahihi na mitaji itakayowawezesha kushiriki kikamilifu katika uchumi unaojengwa mbele yao.

Aidha, viongozi wa kisiasa, watendaji wa Serikali, wataalamu pamoja na sekta binafsi wanapaswa kushirikiana kujenga mazingira yanayowezesha wananchi kuwa washiriki wa maendeleo badala ya kuwa watazamaji.

Ni wakati wa kutafakari kwa kina:

Dira ya Ngara tuitakayo ni ipi?

Je, fursa zilizopo zimegeuzwa kuwa ajira, biashara na kipato kwa wananchi?

Wananchi wamewezeshwa kwa kiwango gani kushiriki katika miradi mikubwa ya maendeleo?

Taasisi za Serikali na wataalamu wake zinatoa msaada wa kutosha kuwawezesha wananchi kutumia fursa zilizopo?

Tunajiandaa vipi kuhakikisha kizazi cha sasa na kijacho kinanufaika na mabadiliko haya ya kiuchumi?

Majibu ya maswali haya yataamua kama Ngara itakuwa kitovu cha maendeleo kinachowanufaisha wananchi wake au eneo ambalo fursa hupita bila kuacha manufaa ya kudumu.

Ngara tuitakayo haitajengwa kwa maneno pekee. Itajengwa kwa dira iliyo wazi, uongozi wenye maono, taasisi zinazowajibika na wananchi walioelimishwa, waliowezeshwa na walio tayari kutumia fursa zilizopo.

Tukitimiza hayo, Ngara inaweza kuwa mfano wa maendeleo jumuishi nchini Tanzania.
Ngara tuitakayo inaanza na sisi wenyewe.